partisipa iha Fórum ba dala XVIII Imprensa Ofisiál sira Lian Portugés nian.
Díli, Loron 11 Fulan Juñu 2026
Membru Konsellu Diretivu INTL, I.P kompostu husi Presidente Dr. Jaime F. M. C. Correia, Vice-Presidente Dr. Pedro Sarmento, Vogal Dr. Marcos Antonio Alves, Fiskal Úniku Dr. Nelson Maria dos Santos Menezes ne'ebé akompaña husi Xefe Gabinete PCM Dr. Victor Maia partisipa iha Fórum ba dala XVIII Imprensa Ofisiál sira Lian Portugés nian.
Hanesan partisipante ba Fórum Imprensa Ofisiál sira hosi País sira Lian Portugés nian (IOLP), ne'ebé kompostu husi Angola, Brazil, Cabo Verde, Mosambike, Portugál, São Tomé no Prínsipe no Timor-Leste. Fórum XVIII hala'o koinside ho Aniversáriu ba dala 50 Diário da República Portuguesa (Jornál Ofisiál República Portugés nian).
XVIII Fórum Imprensa Ofisiál sira Lian Portugés nian hala'o durante loron tolu iha sidade Porto husi loron 14 to'o 16 Maiu 2026, no loron rua iha sidade Lisboa iha loron 11 no 12 Maiu, ne'ebé membru sira halo visita ba instalasaun INCM hodi observa direta ba atividade produsaun dokumentu seguransa sira Estadu nian.
Delegasaun husi Imprensa Nasionál Timor-Leste kompostu husi membru Konsellu Diretivu no Fiskal Úniku, no hetan akompañamentu husi reprezentasaun Ministériu Prezidénsia Konsellu Ministru.
Iha loron 14 no 15, hala'o sesaun prinsipál sira Fórum nian, iha-ne'ebé ko'alia kona-ba asuntu oioin ne'ebé relasiona ho funsionamentu, modernizasaun no dezafiu sira ne'ebé hasoru hosi Imprensa Nasionál sira hosi nasaun membru komunidade Luzófona nian.
Durante prosedimentu, membru ida-idak husi Fórum iha oportunidade hodi aprezenta sira-nia esperiénsia institusionál, fahe prátika di'ak liu, no diskute progresu no dezafiu sira ne'ebé hasoru iha área produsaun editoriál, dijitalizasaun dokumentu, jestaun administrativa no prezervasaun patrimóniu dokumentál ofisiál.
Partisipasaun Imprensa Nasionál Timor-Leste nian, nu'udar membru ne'ebé joven liu entre membru sira seluk hosi países CPLP, sai oportunidade importante ida ba INTL hodi aumenta esperiénsia no koñesimentu, no mós habi'it relasaun kooperasaun institusionál entre Imprensa Ofisiál Lian Portugés sira seluk ne'ebé konsolidada ona no iha ona esperiénsia.
