INTL HALA’O SEMINÁRIU KONABA PRODUSAUN DOKUMENTUS LEGAIS HAMUTUK HO PJA
INTL HALA’O SEMINÁRIU KONABA PRODUSAUN DOKUMENTUS LEGAIS HAMUTUK HO PJA
Imprensa Nasional de Timor-Leste, I.P. (INTL) hala’o semináriu kona-ba Produsaun Dokumentus Legais, ne’ebé partisipa husi reprezentante sira hosi Ministériu no Linha Ministeriál sira. iha Salão Sentru Formasaun João Paulo II Comoro Dili. Semináriu ida-ne’e realiza hamutuk ho PJA, ho objetivu atu fahe informasaun no koñesimentu kona-ba prosesu produsaun dokumentus legál, no promove produtu sira ne’ebé INTL disponibiliza ba públiku.
Iha oportunidade ne’e, INTL la’ós de’it fahe informasaun kona-ba produsaun dokumentus legál, maibé mós hato’o informasaun kona-ba produsaun no servisu seluk ne’ebé instituisaun ne’e oferese. INTL mós fahe brosura informativa kona-ba INTL, I.P., hodi fó hatene liután ba partisipante sira kona-ba knaar, servisu no produsaun sira ne’ebé disponivel.
Aleinde ne’e, INTL halo mós aprezentasaun no espozisaun ba livru jurídiku sira, dokumentus legál no produtu publikasaun seluk, hodi fó oportunidade ba reprezentante sira hosi linha ministeriál atu haree diretamente no koñese di’ak liután kona-ba produtu no servisu sira ne’ebé INTL produz.
Atividade ida-ne’e sai nu’udar momentu importante atu hametin kooperasaun entre INTL, PJA no instituisaun governamentál sira, no mós atu promove koñesimentu kona-ba dokumentus legál ofisiál no produtu publikasaun sira iha Timor-Leste.
Liu husi semináriu no atividade divulgasaun ida-ne’e, INTL kontinua kompromete atu hadi’a servisu publikasaun, fahe informasaun ba públiku no aproxima liután nia produtu no servisu ba instituisaun sira no komunidade.
Imprensa Nasional de Timor-Leste, I.P. (INTL)
Publikasaun Ofisiál.