Formasaun kona-ba Jestaun Portal Ofisial

Palásiu Governu, Loron 30 Fulan Abril Tinan 2026

INFORMASAUN

Funsionáriu sira husi Imprensa Nasionál Timor-Leste, Institutu Públiku (INTL, I.P.), tuir formasaun kona-ba jestaun portal ofisiál durante loron 1 (ida) iha salaun enkontu SECOMS, Palásiu Governu.

Díli, Loron 01 Fulan Maio Tinan 2026

Imprensa Nasionál Timor-Leste, Institutu Públiku (INTL, I.P.) nomea funsionáriu nain 10 (sanulu) hodi tuir formasaun kona-ba jestaun portal ofisiál INTL, I.P., ne’ebé fasilita husi tékniku sira husi TIC TIMOR, I.P.

Objetivu husi formasaun ne’e rasik mak hodi hasa’e koñesementu tékniku funsionáriu sira nian kona-ba oinsa bele operasionaliza portal refere ho profisionál no kontinuidade.

Antes atu hahú formasaun refere, Xefe Departamentu Komersiál no Marketing INTL, I.P., Sr. João Bosco Xavier Pinto, reprezenta Konsellu Diretivu INTL, I.P. hodi hato’o liafuan badak ba partisipante sira. Iha intervensaun ne’e, nia husu ba partisipante sira atu aproveita didi’ak oportunidade ne’e tambá importante tebes ba interese hasa’e visibilidade institusionál perante públiku.

Durante prosesu formasaun ne’e, nota katak partisipante sira atentu maka’as tebes no proativa iha diskusaun kona-ba matéria ne’ebé oferese husi formadór sira.

Iha enseramentu atividade formasaun refere, programa taka ho hasai fotográfia hamutuk entre formadór sira (Ekipa TIC Timor, I.P.) ho formandu sira (Ekipa INTL, I.P.) ho ambiente ne’ebé amigável tebes.