Dili, 01 Jullu 2026

Imprensa Nacional de Timor-Leste, Institutu Públiku (INTL, I.P.), liuhusi Departamentu Komersiál no Marketing (DCM), iha loron 29 Fulan Juñu Tinan 2026 simu vizita no fó atendimentu espesiál ba reprezentante husi Library of Congress Jakarta Office, Ibu Ade Farida. Vizita ne’e hala’o ho objetivu atu hametin liután kooperasaun iha akizisaun ba dokumentu ofisiál sira.

Iha enkontru ne’e, ekipa DCM hatudu responsabilidade boot hodi esplika kle’an kona-ba produtu no serbisu sira ne’ebé INTL, I.P. oferese. No mós fó asesu ba dokumentu importante sira hanesan Jornal da República no publikasaun istórika seluk ne’ebé importante tebes ba dokumentasaun mundiál.

Ibu Ade Farida haksolok tebes ho atendimentu no serbisu profisionál husi ekipa Departamento Marketing no komercial. Kooperasaun ida ne’e sei ajuda Library of Congress atu asesu no fasil liután ba dokumentu legál no publikasaun ofisiál sira husi Timor-Leste.